د کابل ولايت د مرافعه محکمې د مسؤولينو په هڅو د قتل موضوع حل او فصل شوه
د کابل ولایت د مرافعه محکمې عمومي رئیس محترم مفتي ذبیح الله (ساجد) او د جزا دېوان سرپرست رئیس محترم مولوي عبدالرازق (عدالت) په ډېرو هڅو، ترغیب او د قومي مشرانو په منځګړيتوب په ۹ /۴/ ۱۴۴۶هـ ق نېټه د قتل موضوع حل او فصل شوه.
د قتل یاده موضوع په ۱۴۴۳هـ ق نېټه د کابل ولایت د قره باغ ولسوالۍ اړوند ساحه کې ترافیکي پېښه کې رامنځته شوې وه، مرافعه محکمې ته له راجع کېدو وروسته د یادې محکمې مسؤولينو دواړه لوري سولې ته وهڅول او جانبینو هم سولې ته غاړه کېښوده.
وروسته ياده موضوع د يوې غونډې په ترڅ چې قومي مشرانو، سپين ږیرو، د قاتل او مقتول وارثينو په کې ګډون درلود؛ حل او فصل شوه، د مقتول کورنۍ قاتل ته بخښنه وکړه او موضوع يې رسماً پای ته ورسېده.
