د کونړ ولایت مرافعه محکمې رئیس د یاد ولایت له عمومي محبس څخه لیدنه وکړه
د کونړ ولایت مرافعه محکمې عمومي رئیس محترم الحاج مولوي عبدالکریم (شعیب)؛ د ښاري ابتدئیه محکمې رئيس محترم مولوي ظاهرالله (مروان) او د مرافعه او ښاري ابتدائیه محاکمو د دېوانونو رئیسانو په ملتیا، په ۲۶/ ۵/ ۱۴۴۷هـ ق نېټه د یاد ولايت له مرکزي عمومي محبس څخه لیدنه وکړه.
یاد پلاوي لومړی د محبس له آمر مولوي نعمت الله زید سره د بندیانو اړوند موضوعاتو باندې تفصیلي مجلس وکړ؛ ورپسې يې د یاد محبس د بندیانو ستونزې واورېدې او د حل ډاډ يې ورکړ.
د ليدنې په وروستيو کې د مرافعه محکمې رئيس بندیانو ته وینا وکړه وویل، خپل عبادت کوئ، درسونه وایئ چې هم مو اجر وي او هم به د مشرانو د شفقت وړ وګرځئ، له بخښنې او تخفیف به استفاده وکړئ او زندان د ځان لپاره د عبرت درس جوړ کړئ، ترڅو بیا بدو کړنو ته مخه نکړئ.
