په میدان وردګو ولایت کې ۲ تنو متهمینو ته تعزیري سزا ورکړل شوه
د روان ۱۴۴۶ هـ ق کال د صفر المظفر د میاشتې په (۳) مه نېټه د میدان وردګو ولایت د دایمیرداد ولسوالۍ ته څېرمه د سید جمال الدین د لیسې په انګړ کې د یادې ولسوالۍ د ابتدائیه محکمې له لوري (۲) تنو متهمینو ته د غلا په تور تعزیري سزا ورکړل شوه.
یاد مراسم چې د قرآن کریم په تلاوت پيل شول، په کې د میدان وردګ ولایت د مرافعه محکمې رئیس مولوي عبدالله فرقاني، د همدې ولسوالۍ د ابتدائیه محکمې رئیس مولوي اسدالله احمدي، د دایمیرداد ولسوالۍ ولسوال سردار احمد او د امر بالمعروف آمر مولوي شفیع الله راشد ګډون درلود.
د مراسمو په پیل کې د دایمیرداد ولسوالۍ ولسوال د مراسمو ګډونوالو ته ښه راغلاست ووایه او د دایمیرداد ولسوالۍ د ابتدائیه محکمې له دې کار څخه یې هرکلی وکړ.
ورپسې د میدان وردګو ولایت د مرافعه محکمې عمومي ولس ته د تعزیر په تړاو معلومات ورکړل، محترم مولوي فرقاني وویل، په دې هېواد کې په دومره لوی شمېر سره د قربانيو یوازینۍ موخه د اسلامي نظام راوستل و، حدود او تعزیرات د اسلامي نظام له لویو موخو دي، ځکه دا د الله تعالی احکام دي او په موږ یې تطبیق لازم دی.
نوموړي د خپلو خبرو په دوام وویل، د حدودو او تعزیراتو په تطبیق سره د جرايمو کچه را ټیټیږي، موږ ولیدل له کله چې اسلامي امارت حاکم شوی دی او د حدودو او تعزیراتو تطبیق پیل شوی، موږ او تاسو ټول ددې شاهدانو یو چې هېواد کې د جرايمو کچه په زیاته اندازه سره را ټیټه شوې ده.
ورپسې د دایمیرداد ولسوالۍ د ابتدائیه محکمې رئیس د مراسمو ګډونوالو ته د یادو دوو متهمینو د درې ګونو محاکمو د تعزیر فیصله ابلاغ کړه چې په کې هر یوه ته د (۳۹) دُرو علاوه درې کاله بند ورکړل شو.
غونډه د دعاء په ویلو پای ته ورسېده.
