د سترې محکمې د جنوب لوېديځ زون تميز عالي ریاست له خوا یو ورځنی سیمینار جوړ شو
د سترې محکمې اړوند جنوب لوېديځ زون د تمیز عالي ریاست د دفتر رئیس محترم مولوي محمد عمر (عمري) په مشرۍ؛ د سترې محکمې د کاري پلان او ارزونې فورم د تشرېح په موخه، په ۳/ ۱۱/ ۱۴۴۷ هـ ق نېټه يو ورځنی سیمینار جوړ شو.
یاد سیمینار د قرآنکریم د څو مبارکو آیتونو په تلاوت پیل شو؛ ورپسې د دفتر رئيس ګډونوالو ته هرکلی ووایه او له ټولو اداري کارکوونکو څخه وغوښتل چې خپلې دندې په صداقت، مسلکیتوب او پر وخت ترسره کړي، څو اداري چارې په منظم او اغېزمن ډول پر مخ ولاړې شي.
د غونډې په دوام د تمیز عالي ریاست د تحریراتو آمر محترم عصمتالله (عاصم) د ملکي خدمتونو د کارکوونکو کاري پلان، د اجراآتو د ارزونې او د سترې محکمې د راپور فورمونه ګډونوالو ته وړاندې کړل او بېلا بېلې برخې یې په تفصیلي او واضح ډول تشرېح کړې.
نوموړي څرګنده کړه چې دا پلان د ادارې د فعالیتونو د منظم کولو، د اجراآتو د ارزونې او د مسؤولیتونو د دقیق وېش لپاره یو مهم او بنسټیز سند دی.
همداراز د پلان په تشرېح کې ټینګار وشو چې هره څانګه مکلفه ده، چې خپل کاري فعالیتونه د همدې پلان له مخې تنظیم کړي، راپورونه پر وخت او دقیق وړاندې کړې او د دوسیو، مکتوبونو او عریضو په برخه کې لازم اجراآت په سمه او عادلانه توګه ترسره کړي.
یاد سیمینار د دعاء په ویلو پای ته ورسېد.
