د غزني زون نظامي محکمې په هڅو د قتل پنځه کلنه موضوع حل او فصل شوه
د غزني زون نظامي محکمې مسؤولينو په ډېرو هڅو؛ د قومي مشرانو او مخورو په منځګړيتوب، د قتل یوه موضوع، چې پنځه کاله مخکې رامنځته شوې وه، په ۲۷/ ۱۰/ ۱۴۴۷ هـ ق نېټه حل او فصل شوه.
یاده موضوع د میدان وردګو ولایت بندچک ولسوالۍ، په میر احمد خېلو کلي کې د دوو کورنیو ترمنځ د کورنۍ شخړې په پایله کې رامنځته شوې وه؛ چې له امله يې يو کس وژل شوی و.
یاده موضوع نظامي محکمې ته تر راجع کېدو وروسته په غور او دقت وڅېړل شوه، دواړو طرفونو ته د صلحې ترغيب وشو، دوی هم ومنله، موضوع يې رسماً پای ته ورسېده او شته دښمني يې په دوستۍ بدله شوه.
