د سترې محکمې رئيس او قاضيالقضات محترم شیخ عبدالحکیم (حقاني) صاحب د يوه پلاوي په مشرۍ زابل ولایت ته سفر وکړ
د افغانستان اسلامي امارت سترې محکمې رئيس او قاضيالقضات محترم شيخ عبدالحکیم (حقاني) صاحب د خپلو ولايتي سفرونو او ولايتي محاکمو د چارو د نظارت او بررسۍ په دوام، په ۲۲/ ۱۰/ ۱۴۴۶هـ ق نېټه د يوه پلاوي په مشرۍ زابل ولایت ته سفر وکړ.
د سترې محکمې محترم رئیس او قاضيالقضات د دغه سفر پر مهال لومړی د مرافعه محکمې په ریاست کې د مرافعه محکمې له رئیس محترم مفتي عبدالجليل (سفيان)، د ښاري ابتدائیه محکمې رئيس مفتي فضل الرحمن (فضلي)، د نظامي محکمې رئيس شیخ عبدالقيوم (اخندزاده) او د اړوند محاکمو له قضائي او اداري مسؤولينو سره وکتل.
غونډه د قرآنکريم د څو مبارکو اياتونو په تلاوت پيل شوه، ورپسې قاضيالقضات شيخ صاحب وينا وکړه وويل، زموږ د سفر موخه داده چې د خپلو ماتحت محاکمو له مسؤولينو سره ووينو، د هغوی په حال ځان خبر کړو، موجوده اړتیاوې یې معلومې او د چارو د ښه ترسره کېدو لپاره د مسؤولينو او منسوبینو څخه مشورې او وړاندیزونه واخلو.
دغه راز د سترې محکمې رئیس او قاضيالقضات شيخ صاحب زياته کړه، زموږ او ستاسې پر غاړه ډېر دروند مسؤولیت پروت دی؛ نو په کار ده چې د دغه مسؤوليت د ادا کولو لپاره پوره هڅه او کوښښ وکړو، محاکم د اسلام او اسلامي نظام د بقاء لپاره لازم او ضروري دي او د محاکمو دوام په عدالت سره قایم کېداي شي؛ بناءً د محاکمو مسؤولين بايد خپلې چارې په داسې طريقه ترسره کړي چې په نتیجه کې یې حق حقدار ته ورسېږي، مجرم ته د جرم مطابق سزا ورکړل شي.
په دې سربېره محترم قاضيالقضات شيخ صاحب د محاکمو مسؤولينو ته لاندې هدایات وکړل:
１- د حدودو د تحقيق او سزا ورکولو لپاره د الله (جلجلاله) له لوري اصول ټاکل شوي دي، موږ او تاسو ته په کې اختيار نه دی راکړل شوی؛ نو د یادو مسایلو په تړاو بايد د الهي اوامرو مطابق تحقيق وکړو او مجرمینو ته د الهي امر مطابق سزا ورکړو، په تعزيراتو کې بيا د وخت امام او قاضي ته د تحقيق او سزا ور کولو لپاره اختيار ورکړل شوی دی؛ نو د محاکمو مسؤولين بايد د موضوع پوره تحقیق وکړي، وروسته مجرم ته د هغه د جرم مطابق سزا ورکړل شي.
２- نظام د يوه کور حيثيت لري، په کور کې چې هر غړی خپله دنده په ښه ډول سره ترسره کړي، نو دغه کور جوړېږي او پرمختګ کوي؛ خو که چېرې د کورنۍ غړي خپلې دندې په ښه ډول ترسره نه کړي، نو کور خرابيږي او د له منځه تللو سبب يې کېږي.
３- د علماوو شورا او د سيمې له علماء کرامو سره باید ښې اړیکې وساتئ، ترڅو د علماء کرامو په توسط موضوعات په سوله سره حل شي، په دې سره به له يوې خوا د محاکمو کارونه کم شوي وي او له بلې خوا به د مراجعينو ستونزو ته پر وخت رسېدنه کېږي.
４- بايد له ټولو امارتي ادارو سره پوره همغږي ولرئ، ترڅو در سپارل شوی مسؤولیت په ښه ډول ترسره کړی، چې د اسلامي نظام د بقاء سبب شي.
５- په هره موضوع کې بايد د موضوع له طرفينو سره ښه چلند وشي، خبرې يې په غور واورېدل شي، د موضوع اړوند ټول معلومات ورڅخه واخيستل شي او په غور مطالعه شي، ابتدائيه محاکم باید د موضوع پوره تحقیق وکړي، وروسته له هغه حکم وشي او لوړه محکمه د ابتدائيه محکمې فيصله په غور او دقت وګوري.
د غونډې په پای کې د زابل ولایت مرافعه محکمې رئيس محترم مفتي عبدالجليل (سفيان) د سترې محکمې له رئیس او قاضيالقضات شيخ صاحب څخه مننه وکړه چې د زابل ولایت د محاکمو د چارو د نظارت او دغه راز د دوی د اړتیاوو اورېدو په موخه یې یاد ولایت ته سفر کړی دی.
نوموړي د سترې محکمې محترم رئیس او ورسره مل پلاوي ته ډاډ ورکړ چې ټولې چارې به په ټاکلي وخت د اصولو په رڼا کې ترسره کوي.
د یادونې وړ ده چې د سترې محکمې رئیس او قاضيالقضات محترم شيخ عبدالحکیم (حقاني) صاحب د زابل ولایت په مقام کې د ياد ولايت له والي صاحب، مرستيال والي، د علماوو شورا، استخباراتو او د فرامينو او حکمونو له تطبیق څخه د نظارت رئيس صاحب سره غونډه وکړه، د محاکمو او نورو امارتي ادارو ترمنځ د همغږۍ په ارزښت یې پر تفصیلي خبرو سربېره مسؤولينو ته لازمې سپارښتنې وکړې.
