د زابل د مرافعه محکمې عمومي رئیس د میزانې ولسوالۍ له ابتدائیه محکمې څخه لیدنه وکړه
د ۱۴۴۵ هـ ق کال د شوال المکرم میاشتې په ۱۴مه نېټه د زابل ولایت د مرافعه محکمې عمومي رئیس محترم مفتي عبدالجلیل سفیان د یوه قضائي پلاوي په ملتیا د همدې ولایت د میزانې ولسوالۍ له ابتدائیه محکمې څخه لیدنه وکړه.
د مرافعه محکمې پلاوي د لیدنې په پیل کې د میزانې ولسوالۍ د ابتدائیه محکمې له رئیس او قضائي غړو سره وکتل او د هیئتۍ په اړه یې د تمیز عالي مقام هدایت ــ باید د محاکمو د چارو د لاښه سمون لپاره له ابتدائیه محاکمو څخه وخت په وخت لیدنه وشيــ ورسره شریک کړ.
ورپسې د میزانې ولسوالۍ د ابتدائیه محکمې د اداري او قضائي چارو څخه نظارت وشو او د مرافعه محکمې د رئیس په مشرۍ پلاوي د کارونو د لا ښه سمون او خپل مسؤولیت ته د متوجه کېدو په تړاو ورته لازمې سپارښتنې وکړې.
دغه راز یاد پلاوي د محکمې د مربوطه بندیانو په اړه د محکمې له رئیس څخه معلومات وغوښتل او همدارنګه یې د مربوطه ولسوالۍ د توقیف خانې نظارت وکړ چې د محکمې اړوند بندیان په کې نه وو موجود.
په دې سربېره د مرافعه محکمې یاد پلاوي د میزانې ولسوالۍ د ولسوال، د ولسوال مرستیال، امنیه قوماندان، د استخباراتو مدیر، د امر بالمعروف مدیر او د ولسوالۍ د ابتدائیه محکمې د ټولو کارکوونکو په ګډون د همغږۍ ناسته وکړه.
د مرافعه محکمې رئیس په دې ناسته کې د امیر د اطاعت، د ټولو ادارو ترمنځ د همغږۍ او یو بل ته د همکارۍ په اړه ټینګار وکړ او د یادو مسؤولینو له لوري په دې برخو کې ورته د هر راز همکارۍ ژمنه وشوه.
د میزانې ولسوالۍ مسؤولینو او د محکمې غړو د یاد پلاوي له ورتګ څخه مننه وکړه او ماتحت ادرو ته د مسؤلینو ورتګ یې دکارونو د لاښه والي لپاره ګټور ګام وباله.