د قضائي پلټنې عمومي ریاست مفتشینو د سرپل ولایت له محاکمو او مرکزي زندان څخه لیدنه وکړه
د سترې محکمې محترم مقام په هدایت د قضائي پلټنې عمومي ریاست یوه مؤظف پلاوي د محترم مولوي عبدالبصیر (غزنوي) په مشرۍ؛ چې مولوي سید اسحاق (سادات) او مولوي صبغت الله (ناظم) يې غړيتوب درلود، د روان 1447 هـ ق کال د جمادی الأولی میاشتې په 7 مه نېټه سرپل ولایت ته د محاکمو د تېرو فعالیتونو د څېړنو په موخه سفر وکړ.
د ليدنې په پيل کې ياد پلاوي د مرافعه محکمې له رئیس سره وکتل، ورپسې يې د بندیانو ستونزو د څېړلو په موخه د سرپل ولایت له مرکزي زندان څخه لیدنه وکړه، د یاد محبس اړوند بندیانو شکایتونه يې واورېدل، د ملاحظې وړ بندیانو بشپړ شهرت، کیفیت او شکایتونه يې له ځان سره ولیکل او بیا يې له اړونده محاکمو سره شریک کړل.
یاد پلاوي د خپل کاري پلان له مخې د دغه ولایت د (10) ولسوالیو له ابتدائیه محاکمو، د حقوقو مدیریتونو، د ښاري او مرافعه محاکمو اړوند دېوانونو، وثایقو او حقوقو آمریتونو، مخزن مدیریت او اختصاصي محکمې څخه جلا جلا لیدنه وکړه.
نوموړي پلاوي د پلټنې بهیر په جریان کې د یادو محاکمو د قضائي، اداري او مالي چارو هر اړخیزه پلټنه وکړه، د محاکمو د قضائي او اداري پرسونل د سلوکي او مسلکي اړخونو معلومات يې واخیستل او د چارو د سمون په برخه کې یې ورته لازمې لارښوونې وکړې.
د پلټنې پلاوي د محاکمو اړوند شته ستونزې، کاري خنډونه او نېمګړتیاوې له ځان سره یادداشت کړې او په پای کې د ستونزو د حل، د خنډونو له منځه وړلو او نېمګړتیاوو د اکمال په اړه د یاد ولایت د مرافعه محکمې له مقام سره تفاهمي ناسته وکړه او ټولې ستونزې يې په جلا جلا توګه ورسره شریکې کړې.
د پلټنې دغه پلاوي د خپل سفر په جریان کې د یاد ولایت له والي او د ولسوالیو له ځینو مسؤولینو سره ناستې وکړې، د محاکمو فعالیتونو د لا ښه پرمختګ او د ځینو اړوند ستونزو د حل په موخه د هغوی نظرونه واورېدل.
د قضائي پلټنې پلاوي یاد سفر د 1447 هـ ق کال د جمادی الأولی میاشتې په 22 مه نېټه پای ته ورسېد.
