د کابل ولایت د مرافعه محکمې رئیس د نشه یي توکو او مسکراتو څخه د مخنیوي ابتدائیه محکمې او د یادې محکمې توقیف خونې څخه د څارنې په موخه لیدنه وکړه
د کابل ولایت د مرافعه محکمې رئيس مولوي عبدالشکور " رشاد آخندزاده " صاحب او د مرافعه محکمې د تحریراتو اداري مسئول ښاغلي عنایت الرحمن "صافي، د ۱۴۴۴ هـ ق کال د شوال المکرم د میاشتې په ۲۵مه نېټه د نشه یي توکو او مسکراتو څخه د مخنیوي ابتدائیه محکمې او د یادې محکمې توقیف خونې څخه د څارنې په موخه لیدنه ترسره کړه.
په پیل کې د نشه یې توکو او مسکراتو څخه د مخنیوي ابتدائیه محکمې قضایي چارې د ښاغلي مولوي رشاد اخندزاده صاحب او اداري چارې د ښاغلي صافي صاحب لخوا وکتل شوې؛ د څارنې وروسته د موجوده ستونزو د هواري په موخه هر اړخیزې لارښوونې وشوې او د کارمندانو ښه اجراآت وستایل شول.
د یادې محکمې د اجراآتو له څارنې وروسته ورغلي پلاوي د یادې محکمې مشرتابه په ملتیا د دې محکمې توقیف خونې ته د څارنې په موخه ورغلل او توقیف خونې کې توقیف شويو کسانو سره یې وکتل، د هغوی د غوښتنو د اورېدو وروسته د ښاغلي مولوي رشاد اخندزاده صاحب لخوا د نشه یې توکو او مسکراتو څخه د مخنیوي ابتدائیه محکمې مشرتابه ته هدایت وشو، چې د توقیف شویو کسانو غوښتنو ته دې د شریعت مطابق ژر تر ژره رسیدګي وشي.
