په غور ولایت کې یوه مجرم ته تعزیري سزا ورکړل شوه
نن سه شنبه (۱۴/۵/۱۴۴۵ هـ ق) نېټه د غور ولایت د دولتیار ولسوالۍ د ابتدائیه محکمې د حکم په اساس یوه مجرم ته له کوره د تېښتې په جرم تعزیري سزا ورکړل شوه.
یاد مجرم ته چې محکمې پرې د شپږ میاشتې تنفیذي بند او (۲۵) شرعي دُرو د تطبیق حکم کړی و، د تنفیذي بند د مودې تر پوره کېدو وروسته نن د غور ولایت د مرکز اړوند ورزشي سټډیوم کې تعزیري سزا ورکړل شوه.
د تعزیري سزا د تطبیق په موخه جوړه شوې غونډه کې د محاکمو او نورو ولایتي ادارو پر مسؤولینو سربېره دیني عالمانو، قومي مشرانو او عامو هیوادوالو ګډون درلود.
