د کونړ ولايت د مرافعه محکمې رئیس په مشرۍ اداري غونډه وشوه

د کونړ ولايت د مرافعه محکمې محترم رئیس مولوي محمد ایوب (قلم) په مشرۍ د حقوقو آمریت آمر، د ابتدائيه محاکمو د حقوقو مدیرانو او محررینو په ګډون په ۲۸ /۴ /۱۴۴۶هـ ق نېټه اداري غونډه وشوه.
غونډه د قرآنکريم د څو مبارکو آیاتونو په تلاوت پيل شوه؛ ورپسې د مرافعه محکمې رئیس د غونډې په ارزښت، له مراجعینو سره په غوره چلند، حاضرۍ ته په پابندۍ، په اسلامي نظام کې د اداري فساد په کلکه مخنیوي، حوزوي صلاحیتونو ته په ځانګړې پاملرنه او په چارو کې په شفافیت خبرې وکړې او تر څنګ يې د حقوقو کارکوونکو ته په ځانګړې ډول لارښوونې وکړې.
نوموړي زياته کړه، په محاکمو کې د پرېکړو د تطبیق مرجع د حقوقو آمریتونه او مدیریتونه دي، نو باید په خپله برخه کې په اصولي توګه اجراآت ترسره کړئ او لومړي کسان تاسو یاست چې مراجعین درسره مخامخ کېږي، نو هیله ده چې له دوی سره غوره چلند وکړئ او په چارو کې مو موخه د اسلامي نظام خدمت او د الله تعالی رضا وګرځوئ.
د غونډې په وروستيو کې ګدونوالو په خپل وار سره خبرې وکړې او د خپلو اجراآتو په تړاو يې ډاډ څرګند کړ.
غونډه د دعا په ویلو پای ته ورسېده.