د کابل ولایت قره باغ ولسوالۍ ابتدائیه محکمې مسؤولینو په هڅو د قتل موضوع حل او فصل شوه
د کابل ولایت مرافعه محکمې اړوند، قره باغ ولسوالۍ ابتدائیه محکمې سرپرست رئیس محترم مفتي محمد هاشم (الهام ) په ډېرو هڅو او ترغیب او د قومي مشرانو په منځګړيتوت په ۲۹ /۱۰ /۱۴۴۶ هـ ق نېټه د (۳) تنو مقتولینو د قتل موضوع حل او فصل شوه.
د قتل یاده پېښه چې د روان هجري قمري کال د رمضان المبارک میاشت کې، د قره باغ ولسوالۍ اړوند هوتکي کلي کې رامنځته شوې او درې کسان په کې وژل شوي وو، محکمې ته تر راجع کېدو وروسته په غور او دقت وڅېړل شوه.
ورپسې د ابتدائیه محکمې مسؤولينو د مقتولینو وارثین بخښنې ته وهڅول، له ډېرو هڅو او ترغیب وروسته د مقتولینو وارثینو بخښنې ته غاړه کېښوده.
د مقتولینو کورنۍ د رضایت وروسته په يوه غونډه کې چې قومي مشرانو او سپینږیرو هم په کې ګډون درلود؛ قاتلینو ته بخښنه وکړه او یاده قضیه د محکمې لخوا په رسمي ډول پای ته ورسېده.
