د کابل ښاري ابتدائیه محکمې د درېیم او څلورم زونونو لپاره د څه باندې (۶.۵) میلیون افغانۍ په لګښت جلا جلا ودانۍ جوړې او ګټې اخیستنې ته وسپارل شوې

د افغانستان اسلامي امارت سترې محکمې د عالي مقام په حکم او د سترې محکمې د مالي او اداري چارو عمومي ریاست په هڅو د کابل ولایت د ښاري ابتدائیه محکمې درېیم او څلورم زونونو لپاره د کابل ښار ۱۵مې حوزې په «قصبه» سیمه کې د څه باندې (۶.۵) میلیون افغانۍ په لګښت جلا جلا ودانۍ جوړې؛ د قضائي او اداري چارو د ترسره کولو په موخه ګټې اخیستنې ته وسپارل شوې.
د یادو زونونو د پرانیستې پر مهال د سترې محکمې د مالي او اداري چارو عمومي رئیس محترم الحاج مولوي کریم الله (زاهد) صاحب وویل، د درېیم او څلورم زونونو لپاره د نویو ودانیو د جوړېدو او دلته د یادو زونونو د انتقال اساسي موخه مراجعینو ته د قضائي خدمتونو د وړاندې کولو په برخه کې د لازمو اسانتیاوو رامنځته کول، قضائي خدماتو ته د خلکو آسانه لاس‌رسی او د مراجعینو لپاره د مناسب او معیاري چاپېریال رامنځته کول دي.
نوموړي زیاته کړه، په دغه ودانیو کې (۳۴) رسمي کاري خونې، د محکمې د منسوبینو او مراجعینو لپاره یو باب لوی مسجد، د ښځینه او نارینه مراجعینو لپاره د اوداسه جلا جلا ځایونه او لارې، د ښځینه او نارینه مراجعینو لپاره جلا جلا انتظارخونې، ۲۴ساعته برېښنا او نور ټول اړین امکانات برابر شوي دي. 
یادې ودانۍ محکمې ته د کابل ښاریانو د اړوندو سیمو د اوسېدونکو د لاسرسي د اسانتیا په پام کې نیولو سره په جلا ساحه کې جوړې او هڅه شوې، چې مراجعین په کې د خپلو قضائي او اداري چارو د تعقیب پر مهال له مناسب، منظم او اړینو امکاناتو څخه برخمن شي او د محکمې خدماتو ته یې لاسرسی لا آسانه شي.
د ګل محمد (محمدي) په نوم د دغه زونونو یوه مراجعه کوونکي د  سترې محکمې له عالي مقام څخه مننه وکړه، چې د دوی د سهولت په موخه یې یاد زونونه د دوی د استوګنې نږدې سیمې ته انتقال او مراجعینو ته یې په کې هر ډول لازم امکانات، لکه: د مراجعې ځانګړې لار، د انتظار مناسب ځای، د اوداسه ځایونه، مسجد او داسې نور برابر کړي دي.
د یادونې وړ ده، چې د کابل ولایت د قره باغ ولسوالۍ، د کابل ښار ۱۰مې او ۱۵مې ناحیې د اوسېدونکو دوسیې د کابل ښاري ابتدائیه محکمې د درېیم زون او د کابل د ده سبز ولسوالۍ، د کابل ښار د ۱۷مې، ۱۸مې او ۱۹مې ناحیې د اوسېدونکو دوسیې د کابل ښاري ابتدائیه محکمې د څلورم زون اړوند دي.