د جوزجان د مرافعه محکمې رئیس د رسمي عریضې لیکلو په موخه د هغه ولایت عریضه لیکونکو ته سیمینار جوړ کړ
د سه شنبې په ورځ (۴ /۳ /۱۴۴۵هـ ق) نېټه د جوزجان ولایت د مرافعه محکمې د عمومي رئیس الحاج مفتي عبدالغني (سعید) په مشرۍ د یاد ولایت عریضه لیکونکو ته ښوونیز سیمینار جوړ شو.
دغه سیمینار چې ګڼ شمېر عریضه لیکونکو په کې ګډون کړی و د قرآنکریم د څو مبارکو آیاتونو په تلاوت پیل شو؛ ورپسې د جوزجان ولایت د مرافعه محکمې عمومي رئیس عریضه لیکونکو ته د سترې محکمې د مراجعینو لپاره د رسمي عریضو د لیکلو طرز په اړه عمومي معلومات وړاندې کړل او هغوی ته یې د عریضې لیکلو اصول او مقررات داسې تشرېح کړل.
- په پیل کې باید د عریضې د غوښتنې نېټه په عریضه کې ذکر کړئ.
- د عریضې د اړوند مرجع نوم باید څرګند او ذکر شي.
- د عارض او معروض علیه مکمل شهرت یعنې نوم، د پلار نوم، د نیکه نوم، قوم، کسب، اوسنی او مخکنی استوګنځی، تابعیت او د دواړو د پېژندپاڼې شمېرې ذکر شي.
- په عریضه کې باید د عارض او معروض علیه اهلیت ذکر شي.
- که چېرې عارض وکیل یا وصي وي د وکالت خط یا وصایت خط نېټه او همدارنګه د هغه محکمې نوم چې وثیقه يې ترتيب کړې باید په عریضه کې وليکل شي.
- د مدعی بها پېژندنه که منقول وي جنس، ډول، ځانګړتیاوې او ارزښت يې بايد عریضه کې وليکل شي او که غير منقول وي، موقعيت او د مدعی بها حدود بايد وليکل شي.
- که موضوع جزائي وي، د پېښې ځای او نېټه باید ذکر شي.
- په غوښتنلیک کې باید لاسلیک یا د ګوتې نښانې شامل شي.
- په عریضه کې باید ناسم الفاظ ونه لیکل شي.
- دعوی باید ملزمه وي.
- عریضه باید دومره اوږده نه وي چې قابل د فهم نه وي او دومره لنډه هم نه وي چې ورڅخه مطلب وانه خیستل شي، عریضه باید واضح او روښانه وي.
- دا هم باید روښانه وي چې معروض او معروض علیه نظامي دي که ملکي؟
- عارض باید غوښتنلیک کې د اړوند مرجع څخه په واضع او روښانه ډول خپله غوښتنه وکړي.
د سیمینار ګډونوالو د عریضه لیکنې په اړه دغه جوړ شوی سیمینار ګټور وباله او د محاکمو له مسؤولینو یې مننه وکړه چې دوی ته یې د صحیح رسمي عریضې لیکو په موخه یاد سیمینار ترتیب کړ.
