د قضائي پلټنې عمومي ریاست مسلکي غړو د کونړ ولایت له محاکمو او مرکزي زندان څخه لیدنه وکړه

د سترې محکمې د محترم مقام په هدایت او د قضايي تفتیش د عمومي رئيس مفتي محمدابراهیم جان (ابوالحافظ) په اجازه د دغه ریاست یوه مؤظف پلاوي د 1444 هجري قمري کال د رجب میاشتې په 25مه نېټه کونړ ولایت ته د محاکمو د تېرو فعالیتونو د څېړلو په موخه سفر وکړ.

یاد پلاوي په پيل کې د کونړ ولایت د مرافعه محکمې له رئیس سره وکتل، ورپسې یې د خپل کاري پلان له مخې د یاد ولایت د (15) ولسوالیو د ابتدائيه محاکمو، ښاري محکمې د ریاست او اړوند دېوانونو او د مرافعه محکمې د ریاست او اړوند دېوانونو څخه جلا، جلا لیدنه وکړه.

د سترې محکمې د قضائي تفتیش عمومي ریاست دغه پلاوي د تفتیشي بهیر په ترڅ کې د یادو محاکمو د قضائي، اداري او مالي چارو هر اړخیزه پلټنه ترسره کړه، د محاکمو د قضائي او اداري کارکوونکو د چلند او مسلکي اړخونو په اړه یې پوره معلومات وکړل او د چارو د لاسمون په برخه کې یې ورته لازمې لارښوونې وکړې.

یاد پلاوي د محاکمو اړوند شته ستونزې، کاري خنډونه او لوژستیکي نیمګړتیاوې له ځان سره نوټ کړل او په لومړي قدم کې یې د ښاري محکمې په دېوانونو کې شته مشکلات د ښاري محکمې له رئیس سره شریک کړل، په دویم قدم کې یې د ستونزو د هواري، د خنډونو د له منځه وړلو او د نیمګړتیاوو د اکمال په اړه د کونړ ولایت د مرافعه محکمې د ریاست له مقام سره تفاهمي ناسته ترسره کړه او ټول مشکلات یي په جلا، جلا  توګه ورسره شریک کړل.

پر دې سربېره دغه پلاوي د بندیانو د وضعیت د څېړلو په موخه د کونړ ولایت له مرکزي زندان څخه لیدنه وکړه او د یاد محبس اړوند زندانیانو بشپړ شهرت، کیفیت او شکایتونه یې له ځان سره نوټ او بیا یې د اړوند محاکمو له مسؤولینو سره شریک کړل.

دغه راز مؤظف پلاوي د یاد ولایت د محاکمو د برحاله قضاتو څخه ازموینه واخیستله.

د پلټنې هیئت د خپل سفر په پای کې د کونړ له محترم والي او امنیه قوماندان سره وکتل د محاکمو د فعالیتونو د لاښه پرمختګ او د ځینو مربوطه ستونزو د حل په باره کې د هغوی نظرونه واورېدل.

د قضايي تفتیش د پلټنې هئيت د 1444هجري قمري کال د شعبان میاشتې په 6مه نېټه خپل سفر په داسې حال کې چې له لاسته راوړنو ډک و پای ته ورساوه.