د ننګرهار ولایت د مرافعه محکمې رئیس د یاد ولایت د ټولو محاکمو له مسؤولینو سره وکتل

د شنبې په ورځ ( ۸ / ۳ / ۱۴۴۵ هـ ق) نېټه د ننګرهار ولایت د مرافعه محکمې په تالار کې د مرافعه محکمې د رئیس په مشرۍ د یادې محکمې د دېوانونو، د ښاري ابتدائيه محکمې د دېوانونو او د ننګرهار ولایت د (۲۲) ولسوالیو د قضاتو، مفتیانو، محررینو او اداري کارکوونکو غونډه ترسره شوه .

غونډه د قرآنکریم د څو مبارکو آیاتونو په تلاوت پیل شوه؛ ورپسې د ننګرهار د مرافعه محکمې معاون او د جزاء دېوان رئیس ټولو راغلو قضاتو ته ښه راغلاست ووایه.

دغه راز د مرافعه محکمې رئیس محترم شیخ معاذالله (عارف) د غونډې ګډونوالو ته عالمانه وینا وکړه او قضات یې خپلو مسؤولیتونو ته متوجه کړل.

نوموړي وویل، هغه وخت په یاد کړئ چې اسلامي شعایر به مو نه شول پر ځای کولای، نبوي سنت به مو نشو عملي کولای، د طالب او ملا نوم به مو نشو اخیستی، په ادارو کې به چا نه پرېښودلی، اوس چې الله (جل جلاله) پر تاسې دغه لویه پېرزوینه او لورینه وکړه حکومت یې ستاسې په لاس درکړ او تاسې یې د دغه هیواد واکمنان وګرځولای؛ نو اوس پر تاسې لازمه ده چې د الله (جل جلاله)  شکر ادا کړی، پر خلکو رحم وکړئ، دوسیې یې ورته عاجلې خلاصې کړئ، بېځایه او بې مورده یې مه بندیانوئ او د بندیانو دوسیې عاجلې ورته خلاصوئ.

دغه راز د مرافعه محکمې رئیس قضات د حاضرۍ پابندۍ ته متوجه کړل او د تحریراتو رئيس مولوي عبادالرحمن ته یې دنده وسپارله چې د ولسوالیو د قضاتو حاضري دې وخت پر وخت د ټلېفون له لارې تعقیبوي.

وروسته د ښاري ابتدائيه محکمې رئیس د دې محکمې د قضاتو  په استازیتوب محترم شیخ صاحب معاذالله ته ډاډ ورکړ چې ورسپارل شوو دوندو ته به په خپل وخت رسېدنه کوي او په احسنه توګه به يې اجرا کوي.

غونډه د مرافعه محکمې د عامه امنیت دېوان د مفتي شیخ ولي محمد لخوا د دعاپه ویلو پای ته ورسېده.