د ننګرهار مرافعه محکمې مرستيال د حقوقو، وثایقو او اسنادو د ثبت او مخزن امریتونو منسوبینو ته له مراجعینو سره د ښه چلند سپارښتنه وکړه

د ننګرهار ولايت مرافعه محکمې مرستيال محترم مفتي امان الله (حقاني) او ورسره مل پلاوي په ۲۸/ ۱۱/ ۱۴۴۶ هـ ق نېټه د یاد ولایت د حقوقو، اسنادو د ثبت، وثایقو او مخزن آمریتونو څخه د لیدنې پر مهال د یادو امریتونو منسوبینو ته سپارښتنه وکړه چې د تېر په څېر له مراجعینو سره غوره چلند کوئ.
د ليدنې په پيل کې د مرافعه محکمې مرستيال د یادو آمریتونو له اندراجونو، صادرې، رسیداتو او د عرايضو له کتابونو څخه نظارت وکړ.
ورپسې نوموړي مسؤولينو ته سپارښتنه وکړه چې خپل لارښود په ښه ډول تطبیق کړئ، اداري کارکوونکي يې خپلو دندو ته متوجې کړل، تر څو د دنیوي او اخروي مسؤولیت په نظر کې نیولو سره خپل کارونه په اخلاص، صداقت او ایماندارۍ سره سرته ورسوي او د الله تعالی (جل جلاله) رضاء حاصله کړي.
دغه راز د مرافعه محکمې مرستيال د یادو امریتونو اړوند مسؤولینو ته وویل، له مراجعینو سره ښه چلند وکړئ او خپلې چارې پر وخت اجرا کړئ، د خپلو آمرینو اطاعت کوئ؛ ځکه د اسلامي نظام بقاء د آمر په اطاعت کې ده.
د مرافعه محکمې مرستيال د اداري کارکوونکو پر دندو او صلاحیتونو خبرې وکړې او هغوی ته يې په خطاب کې وویل، د یو او بل پر دندو کې مداخله مه کوئ، په رسمي وخت کې خپلو دندو ته ځانونه حاضر کړئ، کوم اصول او تعلیماتنامې چې محاکمو ته په واک کې ورکړل شوې باید په ښه ډول تطبیق شي.
په وروستيو کې د غونډې ګډونوالو خپلې ستونزې او نظریات شریک کړل او غونډه د دعاء په ویلو پای ته ورسېده.