د سترې محکمې امنیتي او اجرائيوي چارو ریاست اړوند د تېرو فعالیتونو، لاسته راوړنو د ارزونې او د مسؤولینو ترمنځ د همغږۍ د تقویې غونډه وشوه
د سترې محکمې امنیتي او اجرائيوي چارو ریاست د رئیس محترم الحاج مولوي محمد عوض (سعید) په مشرۍ د روان ۱۴۴۶هـ ق کال د شوال المکرم د میاشتې په ۱۹مه نېټه، د نظامي محاکمو امنیتي او اجرائيوي قطعاتو قوماندانۍ، مدیریتونو او آمریتونو د تېرو فعالیتونو او لاسته راوړنو د ارزونې او مسؤولینو ترمنځ د همغږۍ د لا ښې تقویې په موخه غونډه وشوه.
په یاده غونډه کې چې د قرآنکریم د مبارکو آیاتونو په تلاوت سره پیل شوه، د سترې محکمې امنیتي او اجرائيوي چارو رئیس محترم الحاج مولوي محمد عوض (سعید)، د نظامي محاکمو امنیتي او اجرائيوي قطعاتو قوماندان حافظ حکمت الله آغا ذهـــین، د ریاست دفتر عمومي مدیر الحاج مولوي خان محمد مستغفر، د محاسبې عمومي مدیر مولوي محمد اسماعیل ناظم، نورو مسؤولینو او منسوبینو ګډون درلود.
محترم الحاج مولوي محمد عوض (سعید) د نظامي محاکمو امنیتي او اجرائيوي قطعاتو قوماندانۍ، د ریاست د مدیریتونو او آمریتونو د تېرو فعالیتونو د ښه خدمت کولو ستاینه وکړه همدا راز یې مسؤولینو ته د وخت د ارزښت په اړه تفصیلي خبرې وکړې وویل، د وخت ښه مدیریت مو د الهي مسؤولیتونو په اداء کولو کې مرسته کوي، د بېګټې مصروفیتونو څخه ځانونه وساتئ تر څو د مسؤولیت په ښه اداء کې پاتې رانشئ.
دغه راز نوموړي د امر بالمعروف او نهی عن المنکر په ترسره کولو ټینګار وکړ وویل، هر څوک مسؤولیت لري چې په خپله اداره کې دغه چاره ترسره کړي تر څو مو الهي مسؤولیت اداء او ټولنه مو له شر څخه په امان وي.
یاده غونډه د دعا په ویلو سره پای ته ورسېده.
