محترم مولوي کليم الله د پکتيا د زرمت ولسوالۍ د ابتدائيه محکمې د نوي رئيس په توګه معرفي شو
د پکتيا ولايت د زرمت ولسوالۍ د ابتدائیه محکمې لپاره نوی رئیس محترم مولوي کلیم الله (انس) په ۸/ ۲/ ۱۴۴۶ هـ ق نېټه د یادې محکمې کارکوونکو ته د يوې غونډې په ترڅ کې ور وپېژندل شو.
په دې موخه جوړه شوې غونډه چې د يادې ولسوالۍ ولسوال، امنیه قوماندان، د استخباراتو مدیر او نورو مسؤولینو په کې ګډون درلود؛ د قرآنکریم د څو مبارکو آیاتونو په تلاوت پیل شوه.
ورپسې د یادې ولسوالۍ د ابتدائیه محکمې مفتي مولوي محمد قاسم (عاکف) وینا وکړه وويل، محاکم په نظام کې د پایې حیثیت لري او استحکام یې په پوره همغږۍ سره کېږي؛ نو له محاکمو سره ستاسو ټولو ادارو ښه همغږي اړينه ده.
د غونډې په دوام نوي رئیس مولوي کلیم الله (انس) وویل، له الله تعالی څخه د را سپارل شوي مسؤولیت د ښه ترسره کولو توفیق غواړم او تر خپله وسه به هڅه کوم چې د هېوادوالو ستونزو او دوسيو ته رسېدنه وکړم.
ياده غونډه د دعا په لوستلو پای ته ورسېده.
