د کونړ مرافعه محکمې او اړوند ابتدائیه محاکمو ته د حقوقو آمریت او مدیریتونه انتقال شول
د عالیقدر امیر المؤمنین حفظه الله د (۱۷۶۹) ۶/۴/۱۴۴۴ هـ ق ګڼې حکم د هدایت په اساس د روان 1444 هجري قمري کال د رمضان میاشتې په ۱۷مه د کونړ ولایت د محاکمو ریاست د غونډو په تالار کې محاکمو ته د حقوقو آمریت د انتقال د پروسې په هکله غونډه ترسره شوه.
د یادې غونډې مشري د کونړ ولایت د مرافعه محکمې رئیس محترم عزیز الرحمن «حقاني» کوله، په غونډه کې د کونړ ولایت ښاري محکمې رئيس مولوي محمد ایوب (قلم)، د محاکمو د دېوانونو رئیسانو او یو شمېر نورو مسؤولینو او د حقوقو آمریت د مرکز او ولسوالیو ټولو مسؤولینو حضور درلود.
د غونډې په پیل کې محترم مولوي عزیز الرحمن «حقاني» ګډونوالو ته په ورسپارل شویو دندو کې د صداقت، ایماندارۍ او شفافیت هدایت او سپارښتنه وکړه.
نوموړي حاضرۍ ته پر پابندۍ د ټینګار تر څنګ په ټولو حقوقي موضوعاتو کې اړوند مسؤولینو ته لارښوونه وکړه چې د موضوعاتو په ترتیبولو کې د پوره غور او دقت وکړي.
دغه راز د کونړ ولایت د ښاري محکمې رئیس محترم مولوي محمد ایوب «قلم» هم په خپل وار د غونډې ګډونوالو سره لازمې لارښوونې شریکې کړې .
ورپسې د کونړ ولایت د عدليې رئیس محترم مفتي عبدالستار «حماس» د محاکمو ریاست ته د حقوقو آمریت د انتقال په هکله هر اړخیزه وینا وکړه او د یاد آمریت کارکوونکو ته یې په خپلو ورسپارل شوو دندو کې د شفافیت غوښتنه وکړه.
د غونډې په دوام د حقوقو آمریت د ټولو کارکوونکو په استازیتوب د حقوقو آمر خپل نظریات او لارښوونې شریکې کړې، د مرافعه محکمې رئیس ته یې د خپلو اجراآتو څخه ډاډ ورکړ او د اړوند ولسوالیو مدیرانو او مسلکي غړو ته یې په اجراآتو کې د مسلکيتوب سپارښتنه وکړه.
د غونډې په پای کې د مرافعه محکمې رئیس د حقوقو آمریت ټولو منسوبینو ته د هر راز همکارۍ او لازمو اسانتیاوو د برابرولو ژمنه وکړه.
غونډه د محترم مولوي محمد ایوب « قلم» په دعائیه کلماتو پای ته ورسېده.
باید وویل شي چې له غونډې وروسته حقوقو آمریت د انتقال پروسه د تعین شوي پلاوي په حضور کې ترسره شوه او د حقوق ریاست د پرسونل لپاره یې د محاکمو ریاست په دفتري تعمیر کې د اموراتو د سرته رسولو په موخه مناسب ځایونه په واک کې ورکړل او په خپلو ورسپارل شوو دندو یې پیل وکړ.
