د لغمان ولایت د محاکمو د مسؤولینو ترمنځ اداري ناسته ترسره شوه
د ۱۴۴۵ هـ ق کال د صفرالمظفر میاشتې په ۱۹مه نېټه د لغمان ولایت د مرافعه محکمې په انګړ کې د یاد ولایت د مرافعه محکمې د رئیس الحاج مفتي عبدالله(فرقاني) په مشرۍ اداري ناسته ترسره شوه.
یاده غونډه چې د لغمان ولایت د مرافعه محکمې د دېوانونو رئیسانو، د ښاري محکمې رئیس او د دېوانونو رئیسانو اوهمدارنګه د ولسوالیو د ابتدائیه محاکمو قضاتو په کې ګډون درلود، د کلام الله د څو مبارکو آیاتونو په تلاوت پیل شوه.
ورپسې د مرافعه محکمې رئیس ګډونوالو ته ښه راغلاست ووایه او پرانیستونکې وینا یې وکړه.
د مرافعه محکمې رئیس دغه راز د غونډې ګډونوالو ته د عالیقدر امیرالمؤمنین حفظه الله باارزښته او قېمتي لارښوونې واورولې او زیاته یې کړه چې عالیقدر امیرالمؤمنین حفظه الله غواړي چې هر یو قاضی مو باید د هر قسم فشار په مقابل کې د شریعت څخه تېر نشي، د ظلم مخنیوی وکړي، د بې برخلیکه بندیانو په اړه جدي اقدام وکړي، له ولس سره ښه چلند وکړي او داسې احساس په ځان کې پیداکړي چې نظام د ځان او ځان د نظام وګڼي.
پر دې سربېره په غونډه کې د لاندې موضوعاتو په اړه بحث وشو:
- د دوسیو له ځنډولو څخه په کلکه مخنیوی وشي.
- عریضې باید لمړی په اصولو او شرایطو برابرې وي، وروسته ورباندې اجراآت وشي.
- ځینې موضوعات چې له نورو اداراتو سره اړه لري باید له مربوطه ادارې سره په همغږۍ حل او فصل شي.
ورپسې د غونډې ګډونوالو خپل نظرونه او مشکلات واورول چې د حل په موخه یې لازم هدایات ترسره شول.
غونډه د دعا په ویلو سره پای ته ورسېده.
