د پکتیا د روحاني بابا ولسوالۍ د ابتدائيه محکمې په هڅو د مقتول کورنۍ لخوا قاتل ته بخښنه وشوه
د روان ۱۴۴۵ هـ ق د جمادی الأولی میاشتې په اتمه نېټه د پکتیا ولایت د روحاني بابا ولسوالۍ د ابتدائيه محکمې په هڅو او د قومي مشرانو او سپين ږېرو په منځګړيتوب د قتل قضيه حل او فصل شوه او د مقتول کورنۍ لخوا قاتل ته بخښنه وشوه.
ياده قضيه په ۲۳/ ۳/ ۱۴۴۵ هـ ق نېټه د پکتيا ولايت روحاني بابا ولسوالۍ ابتدائيه محکمې ته راجع شوې وه، محکمې د قضیې له دقیق څېړلو وروسته دواړه لوري سولې ته وهڅول او د سپين ږېرو او قومي مشرانو په منځګړيتوب یې د دواړو لوریو ترمنځ د سولې فیصله چې جانبینو پرې قناعت او رضایت درلود، په یوه غونډه کې ابلاغ کړه.
په همدې موخه جوړه شوې غونډه کې د پکتيا ولايت د مرافعه محکمې عمومي رئيس محترم مفتي عبيد الله (خالد)، د يادې ولسوالۍ ولسوال، امنيه قوماندان، د نورو ادارو مسؤولينو او د يادې سيمې عامو اوسېدونکو ګډون درلود.
په دې غونډه کې د مرافعه محکمې عمومي رئيس په خپلو خبرو کې د يادې ولسوالۍ ولسونه مجاهدين وبلل، د يادو ولسونو همکاري يې له اسلامي امارت سره وستايله او راغلو ګډونوالو ته يې اصلاحي وينا وکړه.
د غونډې په پای کې د روحاني بابا ولسوالۍ ولسونو دې ولسوالۍ ته د مرافعه محکمې د عمومي رئيس د راتګ هرکلی وکړ او د محاکمو له رهبرۍ يې د زړه له تله مننه وکړه.
