هلمند ولايت کې درېیو متهمينو ته تعزيري سزا ورکړل شوه
د هلمند ولایت د مرافعه محکمې اړوند د باباجي ولسوالۍ د ابتدائیه محکمې د پرېکړې په اساس درېیو کسانو ته چې په قطاع الطريقۍ او غلا متهم وو؛ په عام محضر کې تعزيري سزا ورکړل شوه.
ابتدائيه محکمې د يادو متهمينو له جملې دوه تنه پر دوه کاله تنفيذي بند او ۳۹ دُرو تعزيري سزا او درېيم متهم پر اته مياشتې تنفيذي بند او ۳۰ دُرو تعزیري محکوم کړی و.
په دې موخه جوړه شوې غونډه کې د يادې ولسوالۍ ولسوال، امنيه قوماندان، د استخباراتو مسؤول د نورو ادارو مسؤولینو او عامو هېوادوالو ګډون کړی و.
غونډه کې د یادې محکمې قاضي او علماء کرامو د موضوع اړوند مهمې خبرې وکړې.
د یادونې وړ ده چې ياده پرېکړه د هلمند د مرافعه محکمې، د جنوب غرب زون د تميز عالي ریاست او د سترې محکمې د قضائي معاونيت له تائيد وروسته تطبيق شوه.
