د ننګرهار ولايت مرافعه محکمې رئيس د یاد ولايت د زندانونو چارو له سمون رياست څخه ليدنه وکړه

د ننګرهار ولايت مرافعه محکمې رئيس محترم خلیفه مولوي محبوب الرحمن (نقشبندي) او ورسره مل پلاوي په ۴/ ۲/ ۱۴۴۷ هـ ق نېټه په عدلي او قضائي برخو کې د همغږۍ د پياوړتیا، د بندیانو د دوسیو د حل او فصل بهیر ارزونې او د زندانونو چارو سمون ریاست د وضعیت د څېړنې په موخه د یاد ولايت د زندانونو چارو له سمون ریاست څخه ليدنه وکړه.
د لیدنې په پیل کې د مرافعه محکمې رئيس د محبس مسؤولینو ته وویل، ستاسې دنده يوازې قلف تړل نه دي؛ بلکې د وجدان دروازې باید خلاصې وي، بندي مجرم دی؛ خو انسان هم دی، انسان ته خدمت مهرباني نه ده؛ بلکې وجیبه ده، په زندان کې ساتل شوی انسان بندیخانې ته نه؛ بلکې اصلاح ته راغلی دی، قانون د دوی اصلاح غواړي نه د دوی هلاکت.
نوموړي زیاته کړه، هڅه وکړئ چې د محبس هر بلاک ته ورشئ، ستونزې يې واورئ او ورته په خپل وخت رسېدنه وکړئ.
د مرافعه محکمې رئيس وویل، زه د زړه له کومې خوښ یم، چې د زندان د دروازو شاته داسې یو چاپېریال لرو چې هم اصلاح ته لار همواروي او هم د توبې، زده کړې او بدلیدو فرصت ورکوي، هر بندي که مجرم هم وي، حق لري چې عدالت ورسره وشي، نه دا چې هېر شي.
د ليدنې په وروستيو کې د بنديانو غوښتنې واورېدل شوې او ډاډ ورکړل شو چې اصولوي غوښتنو ته به یې ژر تر ژره د اصولو مطابق رسېدنه وشي.