د بلخ ولایت د مرافعه محکمې د نوي رئیس د معرفت او مخکني رئیس د مخه ښې غونډه ترسره شوه
د روان هجري قمري کال د رمضان میاشتې په ۱۷مه نېټه د بلخ ولایت د مرافعه محکمې د غونډو په تالار کې د دې محکمې د مخکني رئیس محترم مولوي محمد یوسف "ابوالوفأ" د مخه ښې او نوي رئیس محترم مولوی محمد گلاب "فاروقی" د معرفت په موخه غونډه ترسره شوه. په یاده غونډه کې چې د عاعه امنیت دېوان د رئیس محترم مولوي عبدالسلام "مظهري" لخوا د کلام الله مجید د څو آیاتونو په تلاوت سره پیل شوه، د استیناف محکمې د ټولو دېوانونو رئیسانو، د بلخ ولایت معاون محترم نورالهادي"ابوادریس"، د استخباراتو معاون محترم مولوي عبدالله "عمر"، د بلخ ولایت د مقام د دفتر رئیس محترم مولوي نیازمحمد "وهاج"، د ښاري محکمې او د نظامي زون محکمې منسوبینو، د مخزن او وثایقو آمــر، د مرافعه محکمې د تحریراتو رئیس او د ولســوالیو د ابتـدائیه محاکـمو رئیسانو ګــــډون درلــود. د غونډې په پیل کې د بلخ ولایت معاون محترم (ابوادریس) د ناستې ګـډونوالو په ځانګړې توګه د مرافعه محکمې نوي رئیس ته ښه راغلاست ووایه او تر څنګ یې د اسلامي نظام د ارزښت په تړاو خبرې وکړې وویل، یاد نظام د ډېرو هلو ځلو او قربانیو په پایله کې حاکم شوی، ساتل او پالل یې هم د ورته سختیو ګالل او قربانۍ غواړی. دغه راز نوموړي د استیناف محکمې د پخواني رئیس محترم "ابوالوفأ " په کارونو کې د صداقــت، تقـوا او امانتـدارۍ ستاینه وکړه او نوي رئیس محترم مولوي محمـدگلاب "فاروقي" یې د غونډې ګـــډونوالو ته ور معرفي کړ او په چارو کې یې ورته د لوی خدای "جل جلاله" څخه د بریالیتوب غوښتنه وکړه. ورپسې د بلخ ولایت د استخباراتو معاون محترم مولوي عبدالله "عمر" او د بلخ ولایت د مقام د دفتر رئیس محترم مولوي نیازمحمد "وهاج" په خپل نوبت د قضاء سپېڅلې دندې پر ارزښت مفصلې خبرې وکړې او د قضاء دندې یې دروند مسؤولیت یاد کړ، په قضائي چارو کې یې یوازې د لوی څښتن تعالی څخه د وېرې یادونه وکړه او زیاته یې کړه، د ستونزو په حل کې به له محاکمو سره هر ډول مرسته او همکاري وکړي. دوی د استیناف محکمې د پخواني رئیس محترم "ابوالوفأ" د ریاست کارونه وستایل او له هغه څخه یې مننه وکړه، د استیناف محکمې نوي رئیس ته یې په چارو کې د بریالیتوب غوښتنه وکړه. د استیناف محکمې نوي رئیس هم په خپل وار د غونـډې ګــډونوالو ته ښه راغلاست ووایه او تر څنګ یې د قضاء سپېڅلی دنده دروند دینوي او اخروي مسؤولیت یاد کړ. د استیناف محکمې نوي رئیس د دې محکمې د پخواني رئیس خدمتونه وستایل او په ورځنیو چارو کې یې ورته د لوی خدای (جل جلاله) څخه د مرستې غوښتنه وکړه. نوموړي زیاته کړه د قضاء او محاکمو شتون د نظام د بقاء او پایښت لپاره اړین او ضروري دی. یاده غونډه د ښاري محکمې د رئیس د محترم مولوي آدم خان "ابوجمیل" لخــوا د دعا په ویلــو ســره پای ته ورسېده.
