د سترې محکمې د مرکزي تمیز او دارالانشاء عمومي رئیسانو د هیواد څلورو ولایتونو ته سفر وکړ
د سترې محکمې د عالي مقام په هدایت د سترې محکمې د مرکزي تمیز عالي ریاست رئیس محترم شیخ محمد شریف (حقاني) صاحب او د دارالانشاء عمومي ریاست محترم رئیس مفتي عبدالرشید (سعید) صاحب په ۷/۲/۱۴۴۴ هـ ق نېټه بغلان، کندوز، تخار او بدخشان ولایتونو ته سفر وکړ.
د سترې محکمې د مرکزي تمیز او دارالانشاء عمومي ریاستونو محترمو رئیسانو یادو څلورو ولایتونو ته د سفر پر مهال د محاکمو له مسؤولینو او نورو ولایتي اداري رئیسانو سره تر کتنې وروسته، په هر ولایت کې دوه تنه علماء کرام د تېرې ادارې د نهایي او قطعي شوو فیصلو د کتلو لپاره تعین کړل.
دغه راز دوی په هر ولایت کې یادو دوو علماء کرامو ته کاري دفتر او کاري طرزالعمل تعین کړ، د دوی شهرت یې ثبت او د مشرتابه عالي مقام ته به د منظورۍ لپاره ولېږل شي.
د یادونې وړ ده چې د افغانستان اسلامي امارت د محترم مشرتابه مقام په ذوالحجة الحرام/۱۴۴۳هـ ق نېټه د (هغو فیصلو لپاره چي پخوانۍ اداره کې نهائي یا قطعي شوې وي؛ خو تطبیق شوې نه وي) موضوع په اړه طرزالعمل تایید کړ.
د دغه طرزالعمل په لومړۍ ماده کې راغلي: ((د نوموړې محکمې لپاره دې په ولایت کې د دارالافتاء په مرکز کې کاري دفتر برابر شي، او په کوم ولایت کې چې دارالافتاء نه وي په هغه ولایت کې دې د فقهې مجلس مشر د قاضي په حیث او یو بل تن دې د مفتي او محرر په حیث وټاکل شي او په ولایت کې دې کاري دفتر ورته جوړشي، هغه وسایل چې په کاري دفتر کې ورته ضرورت وي د سترې محکمې لخوا دې ورته برابر شي، د هغوی متفرقه مصرفونه دې د سترې محکمې لخوا ورکول شي، البته نوموړي کسان دې د منظورۍ لپاره د مشرتابه مقام ته پیشنهاد شي)).
