د سترې محکمې د اجراآتو ارزونې او ظرفيت لوړونې رياست لخوا د سترې محکمې اداري کارکوونکو لپاره پنځه ورځنی روزنيز سيمينار جوړ شو

د سترې محکمې د اجراآتو ارزونې او ظرفیت لوړونې ریاست، د سترې محکمې محترم عالي مقام د هدایت په اساس، د روزنیزو سیمینارونو په دوام؛ د سترې محکمې د مرکزي ریاستونو اداري کارکوونکو د ظرفيت لوړونې په موخه پنځه ورځنی روزنیز سیمینار جوړ شو.
په یاد سیمينار کې چې د ۱۴۴۶هـ ق کال د ذوالقعدة الحرام میاشتې په ۵مه نېټه پیل شو، د مسلکي استادانو لخوا د سترې محکمې مرکزي ریاستونو د درېیم، څلورم، پنځم او شپږمو بستونو (۳۳) کارکوونکو ته د اداري مراسلاتو، پلان جوړونې اساساتو، اجراآتو د ارزونې، اړيکو او راپور لیکنې په برخو کې روزنه ورکړل شوه.
د دغه روزنیز سیمینار د اختتام په مراسمو کې د سترې محکمې د اجراآتو ارزونې او ظرفیت لوړونې رئیس محترم حافظ نصیر احمد (صیاد) ګډون درلود.
په دې غونډه کې د اجراآتو ارزونې او ظرفیت لوړونې رئیس د سیمینار ګډونوالو ته په وینا کې د دوی فعال ګډون وستایه وویل، الله تعالی په قران کريم فرمايي، کوم قوم چې د هدایت غوښتنه وکړي الله تعالی هغوی ته هدایت ور په برخه کوي، د خپلې کاري ارتقاء او د ادارې د کارونو د ښه والي په موخه باید تل کوښښ وکړو.
نوموړي زیاته کړه، د اداراتو مامورین باید د سلسله مراتب د اصل په پام کې نیولو سره د خپلو آمرینو اطاعت وکړي او خپل ورسپارل شوې دندې د اصولو سره سم په روڼ او شفاف ډول ترسره کړي.
محترم صیاد وویل، د ادارې په هره سطحه کې چې يو، باید د بیت المال د ملکیتونو، اموالو او اجناسو څخه په ښه توګه ګټه واخلو، د اجناسو د پېشنهاد پر مهال، باید غیر ضروري اجناس پېشنهاد نه کړو او د اسراف څخه ځان وژغورو، ځکه دا د ولس او اسلامي امارت سره خیانت دی.
نوموړي ټينګار وکړ چې مامورین باید خپل کارونه د لایحه وظایفو سره سم مخکې یوسي، ټول کارونه د لایحه وظایف پورې مختص نه کړي، کوم کارونه چې د آمر د لزوم دید په اساس د ادارې د پرمختګ لپاره اړين وي، باید د هدایت سره سم یې په پوره دقت او سرعت سره سرته ورسوي.
په پای کې نوموړي د سیمینارونو د لا ښه والي او اغیزمنتیا په موخه د محترمو برخوالو رغنده نظریات او وړاندیزونه واورېدل.
د یادونې وړ ده چې د روزنیزو سیمینارونو د اصولو سره سم، د پورته ذکر شوي سیمینار ټول ګډونوال د سیمینار په پیل او پای کې وارزول شول، ترڅو د سیمینار پایله ښکاره شي چې له نېکه‌مرغه ترسره شوي سیمینار مثبته پایله درلوده.
یاد روزنیز سیمینار په اختتامیه دعاء پای ته ورسېد.