د ننګرهار مرافعه محکمه کې د دعوت او ارشاد غونډه ترسره شوه
په ۱۵ / ۵ / ۱۴۴۵ هـ ق نېټه د سترې محکمې د دعوت او ارشاد ریاست رئیس محترم مولوي عبدالعزیز (ميوندي) په مشرۍ، د قضائيه قوې د محاکمو د امنیتي او اجرائيوي چارو عمومي ریاست د دعوت او ارشاد عمومي مدیر مولوي رحیم الله (منیب)، د دعوت او ارشاد ریاست مدرس مفتي عصمت الله (برهان) په ګډون د ننګرهار د مرافعه او ښاري ابتدائيه محاکمو له قضاتو، مفتيانو، محررينو او اداري کارکوونکو سره د دعوت او ارشاد غونډه ترسره شوه.
غونډه د قرآنکریم د څو مبارکو آیاتونو په تلاوت پيل شوه؛ ورپسې د سترې محکمې د دعوت او ارشاد ریاست مدرس محترم مفتي برهان عالمانه وینا وکړه، د سترې محکمې عالي مقام د دعوت او ارشاد ریاست د تدریس لپاره مختصر کتاب په اړه يې وضاحت ورکړ، خپله تدريسي برنامه يې له ګډونوالو سره شریکه کړه او په اړه يې ورته لازمې لارښوونې وکړې.
د غونډې په دوام د ننګرهار د مرافعه محکمې سرپرست رئیس محترم مفتي ذبېح الله (ساجد) د سترې محکمې د دعوت ارشاد د محترم رئيس راتګ ننګرهار ولایت ته اړین وباله، د ياد پلاوي راوړل شوې برنامه يې نېک اقدام ياد کړ او د ننګرهار مرافعه او ښاري ابتدائيه محاکمو په استازيتوب يې د دعوت او ارشاد له پلاوي څخه مننه وکړه.
ياده غونډه د دعاء په ويلو سره پای ته ورسېده.
