د سترې محکمې د رئیس او قاضي القضات په هدایت یوه پلاوي جنوب لوېديځ زون ته سفر وکړ
د سترې محکمې د رئیس او قاضي القضات محترم شیخ عبدالحکیم (حقاني) صاحب په هدایت مؤظف پلاوي چې په تشکیل کې یې د پلان او پالیسۍ ریاست د برنامو او پروژو څخه د څار او ارزونې آمر محترم مولوي محمدطاهر (طیب) او د تعمیراتو آمریت انجنیر وحیدالله (امیرزي) ګډون درلود، په ساختماني برخه کې د محاکمو د اړتیاوو معلومولو په موخه د هیواد جنوب لوېديځ زون اتو ولایتونو ته سفر وکړ.
د سترې محکمې یاد پلاوي د جنوب لوېدېځ زون د قضائي تفتیش د غړي الحاج مولوي محمدهاشم (الهام) او د اړوند ولایت د مرافعه محکمې د رئیس په ملتیا او همکارۍ د اتو ولایتونو (بادغیس، هرات، هلمند، فراه، نیمروز، کندهار، روزګان او زابل) له محاکمو لیدنه وکړه.
یاد پلاوي د خپل سفر په ترڅ کې په ساختماني برخه کې د محاکمو اړتیاوې له نږدې وکتلې، په اړه یې د مربوطه محاکمو له مسؤولینو سره خبرې وکړې ، د دوی نظر او وړاندیزونه یې واورېدل.
د سترې محکمې یاد پلاوي د خپل ۱۳ ورځني سفر په ترڅ کې په ساختماني برخه کې د محاکمو د سروې تر بشپړولو وروسته د هغوی اړتیا اولویت بندي او بشپړ راپور یې د سترې محکمې له عالي مقام سره شریک کړ.
