د کندهار ولايت د مرافعه محکمې د غونډو په تالار کې د کندهار او هلمند د قضاتو او مفتي صاحبانو تر منځ اداري غونډه ترسره شوه
شنبه ۷/۱۱/۱۴۴۴ نېټه د کندهار ولایت د مرافعه محکمې د رئيس شيخ مولوي عبدالغفار بحر صاحب په مشرۍ اداري غونډه وشوه، چې د کندهار ولايت د مرافعه محکمې د دېوانونو رئيسانو او اعضاوو، د شهري ابتدائیه محکمې رئيس، د دېوانونو ټولو رئیسانو او اعضاوو، همدا راز د ولسوالیو قاضیانو، مفتيانو، محررينو او د کندهار زون نظامي محکمې رئيس صاحب ګډون درلود، ددې تر څنګ د هلمند ولايت د مرکز او ولسواليو قاضيانو، مفتيانو او محررينو هم شموليت درلود.
غونډه د قرآنکريم په څو مبارکو آياتونو پيل شوه، چې وروسته د مرافعه محکمې د مدني دېوان رئیس محترم مفتي عبدالجلیل(سفیان)صاحب د فیصلو تعلیمات نامه چې (۷۸) مادې لري ولوسته او تشریحات يې ور کړل.
ور پسې د مرافعه محکمې د نظامي منسوبینو دېوان عضو مفتي، محترم عبدالرازق (راشد) صاحب له طرف د نقض فیصلو(۳۷) موارد په ګوته کړل شوه.
د مرافعه محکمې دثبت اسناد وثایقو او مخزن آمر محترم مولوي حبیب الرحمن(نقشبندي) صاحب د وثایقو په هکله معلومات وړاندې کړل او همدارنګه د ولسوالیو محاکمو له مسؤلینو څخه يې غوښتنه وکړه، چې د تیرې ادارې د وثایقو کتابونه که په محاکمو کې موجود وي د حفاظت لپاره يې مخزن ته په اصولي طریقه تسلیم کړي.
د مرافعه محکمې د جزاء دېوان رئيس محترم فضل الله(عاصم)صاحب په خپله وینا کې وویل، چې محاکم دي د خپلو بندیانو له سرنوشت څخه باخبره اوسي او یو نقل د فیصلې دې محبس ته حتماً واستول شي، د مرافعه طلبي په صورت کې دې مربوطه دوسیه د مرافعه محکمې دېوانونو ته راواستوي.
د غونډې په پای کې د مرافعه محکمې رئیس محترم شیخ الحدیث مولوي عبدالغفار (بحر)صاحب د محاکمو د قضائي او اداري اجراآتو په تړاو خپله وینا وکړ او له ټولو ګډونوالو څخه يې غوښتنه وکړه، چې ټول قضائي او اداري اجراآت دې د شریعت د اصولو مطابق پر ټاکلي وخت ترسره کوي او همدا راز له مراجعینو سره دې ښه سلوک او برخورد کيږي. شيخ صاحب د غونډې ګډونوالو ته په خطاب کې وويل، چې له تعلقاتو او میلمستیاوو څخه ځان ساتئ، په اخیر کې د اجراآتو د توحید او یووالي په موخه ټولو محاکمو ته یو سیټ (دمتحدالمالونو مجموعه، د وثایقو رهنمود، د محاکمو لایحه، د صادرې او واردې لارښود، د فیصلو د لیکلو تعلیمات نامه، د اداري اجراآتو تعلیمات نامه، د محاکمو عالي ادارې مکتوبونه، نکاح خط، وکالت خط، حصر وراثت، وصیت خط او د نوم اصلاح وثیقه لیکل شوې نمونه) توزیع کړل شول، له ټولو څخه غوښتنه وشوه، چې پر خپلو ورځني قضائي او اداري کارو کې دې عملي کړي.
یاده غونډه د شیخ مولوي ګل آغا صاحب د ښاري ابتدائیه محکمې رئیس له طرفه د دعاء په ویلو پای ته ورسېده.
