د نورستان د مرافعه محکمې د رئیس په مشرۍ د ولایتي ادارو د مسؤولینو ناسته ترسره شوه
په ۱۴۴۴/۱۱/۱۷ هـ ق نېټه د نورستان ولایت د مرافعه محکمې د غونډې په تالار کې د یادې محکمې د رئیس محترم مفتي عبیدالله (سلیم) په مشرۍ د عدلي، قضائي، امینتي او کشفي ارګانونو ترمنځ د همغږۍ غونډه ترسره شوه.
په دې غونډه کې چې د کلام الله د څو مبارکو آیاتونو په تلاوت پیل شوه، د نورستان د مرافعه محکمې رئیس محترم مفتي عبیدالله (سلیم)، د عدلیې رئیس، د ولایت مقام استازۍ، د امنیه قوماندانۍ استازي، د استخباراتو ریاست استازي او امربالمعروف و نهي عن المنکر ریاست استازي ګډون درلود.
د غونډې په پیل کې د نورستان د مرافعه محکمې رئیس راغلو مسؤولینو ته د ښه راغلاست ترڅنګ د غونډې پر اهمیت هر اړخیزې خبرې وکړې.
وروسته د عدلیې رئیس محترم مولوي عبدالله د قانون په چوګاټ کې د عدلي، قضائي، امنیتي او کشفي ارګانونو مسؤولینو ته د دوی د صلاحیتونو او مسؤولیتونو د ښه ترسره کېدو په تړاو تفصیلي وینا وکړه.
دغه راز د نورو ریاستونو راغلو استازو په خپل وار سره د غونډې د اجنډا په تړاو ویناوې وکړې، قضائي او عدلي ارګانونو ته یې د هر اړخیزې همکارۍ ډاډ ورکړ.
پردې سربېره ګډونوالو په خپل وار سره د ستونزو او مشکلاتو په اړه د ناستې ګډونوالو ته خپل وړاندیزونه شریک کړل او ټولو ارګانونو د اسلامي نظام د استحکام لپاره یو بل ته د لازمې اصولي همکارۍ ډاډ ورکړ.
ناسته د دعاء په ویلو سره پای ته ورسېده.
