د پکتیا ولایت د مرافعه محکمې رئیس د یاد ولایت د دوو ولسوالیو له ابتدائيه محاکمو څخه لیدنه وکړه
د پکتیا ولایت د مرافعه محکمې عمومي رئیس محترم مفتي عبیدالله (خالد)؛ د یادې محکمې د عامه امنیت دېوان رئيس مولوي حمدالله (حمیدي)، د اسنادو، وثایقو د ثبت او مخزن آمریت قضائي محرر مولوي سیدالرحمن (سعید) او د تحریراتو آمر قاري میرزا محمد (رشیدي) په ملتیا په ۱۵ /۶ /۱۴۴۶هـ ق نېټه د یاد ولایت د زرمت او روحاني بابا ولسوالیو له ابتدائيه محاکمو څخه لیدنه وکړه.
یاد پلاوي د ليدنې په پيل کې د ابتدائیه محاکمو له رئيسانو، مفتیانو او محررینو سره وکتل، د یادو محاکمو له اجراآتو څخه یې لیدنه وکړه، قضائي او اداري منسوبینو ته یې د مرافعه محکمې د رئيس لخوا لازمې سپارښتنې وشوې.
د مرافعه محکمې رئیس وويل، خپلې چارې د الله تعالی د رضا په خاطر د اسلامي امارت د اصولو، لوایحو او طرزالعملونو سره سمې ترسره کړئ، حق حقدار ته وسپارئ او هره موضوع په دقیق او شفاف ډول وڅېړئ.
د مرافعه محکمې رئيس زیاته کړه، له مراجعینو سره غوره چلند وکړئ او د اصولو سره سم د ولسوالۍ له نورو مسؤولینو سره په ښه تفاهم چلند وکړئ.
په پای کې یاد پلاوي له ولسوالانو، امنیه قوماندانانو او نورو مسؤولینو سره د ولسوالیو د قضائي پرسونل په شتون کې د همغږۍ ناسته وکړه او د اړوند چارو په اړه يې خبرې وکړې.
