د سترې محکمې محترم رئیس او قاضيالقضات بادغیس ولایت ته سفر وکړ
د سترې محکمې رئيس او قاضيالقضات محترم شيخ عبدالحکيم (حقاني) صاحب د يوه پلاوي په ملتيا په ۱۴/ ۱۰/ ۱۴۴۶هـ ق نېټه، بادغيس ولايت ته سفر وکړ.
محترم شيخ صاحب په دغه سفر کې د مرافعه محکمې او اړوند دېوانونو او نظامي محکمې له رئيسانو، د یاد ولايت له والي الحاج حافظ محمد امین جان (عمري)، مرستیال والي، امنیه قوماندان، د استخباراتو، احکامو او فرامینو، علماوو شورا رئيسانو، د زندانونو چارو آمر او نورو مسؤولینو سره لیدنه وکړه.
قاضيالقضات شیخ صاحب په دې ليدنه کې له حاضرینو سره د محاکمو د فعالیتونو، حقوقي چارو او قضائي بهیر په اړه په خبرو علاوه د دوی نظرونه او غوښتنې واورېدې.
د سترې محکمې رئیس او قاضيالقضات محترم شیخ عبدالحکیم (حقاني) صاحب په خپلو خبرو کې وویل، د قضائي نظام پیاوړتیا د اسلامي عدالت د تأمین لپاره حیاتي ارزښت لري، اړونده ادارې دې له محاکمو سره خپله قانوني او شرعي همکاري لا زیاته کړي، تر څو عدالت تأمین او خلکو ته په ټاکلي وخت شفاف خدمات ترسره شي.
دغه راز محترم شيخ صاحب د محاکمو مسؤولينو ته د زندانیانو د حالت د څرنګوالي، د هغوی د وضعیت د پوښتنې او د هېوادوالو دوسيو ته د ژر تر ژره رسېدو په اړه لازمې سپارښتنې وکړې.
د غونډې په وروستيو کې د امارتي ادارو مسؤولينو بادغیس ولایت ته د محترم قاضيالقضات شیخ صاحب سفر ارزښتناک یاد کړ او ډاډ یې ورکړ چې له محاکمو سره به هر اړخیزه همکاري کوي.
د یادونې وړ ده چې بادغیس ولایت ته د سترې محکمې د محترم رئیس او قاضيالقضات د سفر اصلي موخې د دغه ولایت د محاکمو نظارت او د محاکمو د چارو ارزونه، د محاکمو د اړتیاوو او مسؤولینو د غوښتنو اورېدل او له محاکمو سره د نورو امارتي ادارو د همغږۍ ډېرېدل وو.
